ریاض ایئرپورٹ پر دو ہفتے بعد پروازیں بحال، حوثیوں کی دوبارہ حملوں کی دھمکی

سعودی عرب کے دارالحکومت ریاض میں واقع کنگ خالد انٹرنیشنل ایئرپورٹ انتظامیہ نے اندرونِ ملک اور بین الاقوامی پروازوں کا سلسلہ دوبارہ شروع کرنے کا اعلان کیا ہے۔ اعلامیے کے مطابق ٹرمینل ون اندرونِ ملک جبکہ ٹرمینل ٹو سعودی فضائی کمپنیوں کی بین الاقوامی پروازوں کے لیے مختص کیا گیا ہے، جہاں سے جدہ کے لیے فلائٹس کا آغاز ہو چکا ہے۔ اکتوبر میں حوثی جنگجوؤں کے حملوں کے بعد ایئرپورٹ پر فضائی آپریشن شدید متاثر ہوا تھا، جس میں متعدد افراد جاں بحق اور زخمی ہوئے تھے۔ تاہم پروازیں بحال ہوتے ہی حوثیوں کے فوجی ترجمان یحییٰ سریع نے ایئرلائنز اور مسافروں کو ایئرپورٹ کا استعمال نہ کرنے کی دوبارہ تنبیہ کی ہے، جبکہ سعودی محکمہ شہری دفاع نے ریاض کے رہائشیوں کو ہنگامی نظام کے تحت الرٹ جاری کر دیا ہے۔