پاکستان، برطانیہ، فرانس سمیت 8 ملکوں کا مشرق وسطیٰ میں تنازعات کے سفارتی حل پر زور

پاکستان، ترکیہ، سعودی عرب، مصر (آر فور) اور فرانس، جرمنی، اٹلی و برطانیہ کے وزرائے خارجہ کے استنبول میں ہونے والے تاریخی آٹھ ملکی اجلاس کے بعد جاری مشترکہ اعلامیے میں تمام علاقائی تنازعات کا پائیدار حل اقوامِ متحدہ کی قراردادوں اور سفارت کاری کے ذریعے نکالنے پر زور دیا گیا ہے۔ اعلامیے کے مطابق وزرائے خارجہ نے ایران امریکہ تنازع، مسئلہ فلسطین، غزہ میں دو ریاستی حل، سعودی عرب پر حوثی حملوں اور آبنائے ہرمز و باب المندب جیسی عالمی بحری گزرگاہوں کی سلامتی پر تفصیلی تبادلہ خیال کیا۔ اجلاس میں عالمی تجارتی سپلائی چین اور توانائی کی قیمتوں کو مستحکم رکھنے کے لیے بحری راستوں کے تحفظ اور کشیدگی میں کمی پر اتفاق کیا گیا۔ اس موقع پر نائب وزیراعظم اسحاق ڈار نے ترک ہم منصب حاقان فیدان سے الگ ملاقات کی، جس میں دونوں رہنماؤں نے سعودی عرب پر حوثی حملوں کی شدید مذمت کرتے ہوئے مشرقِ وسطیٰ میں امن کے لیے قریبی رابطہ برقرار رکھنے کا اعادہ کیا۔