سکوٹی پر سفر کرتی لڑکی سے غنڈہ گردی اور تشدد کرنے والا ملزم گرفتار

لاہور کے علاقے مزنگ میں اسکوٹی پر سفر کرنے والی ایک خاتون کو سرِعام ہراساں کرنے اور اس پر تشدد کرنے والے مرکزی ملزم کو پولیس نے فوری کارروائی کرتے ہوئے گرفتار کر لیا ہے۔

پولیس حکام کے مطابق ملزم غلام مصطفیٰ نے مزنگ لنک روڈ پر اسکوٹی سوار لڑکی کی گاڑی کو ٹکر مار کر زبردستی اس کا راستہ روکا، جس کے بعد ملزم نے لڑکی کو نیچے گرا کر تھپڑ مارے، بال نوچے اور شدید تشدد کا نشانہ بنایا۔ اس تشدد کے نتیجے میں متاثرہ لڑکی کے چہرے اور ناک پر شدید زخم آئے، جبکہ اس کے لیپ ٹاپ اور بیگ کو بھی نقصان پہنچا۔ ملزم نے لڑکی کا موبائل اور لیپ ٹاپ چھیننے کی بھی کوشش کی۔

پولیس کے مطابق گرفتار ملزم ضلع چنیوٹ کا رہائشی ہے، جس کے خلاف متاثرہ لڑکی کے والد کی مدعیت میں تھانہ مزنگ میں مقدمہ درج کر کے تفتیش شروع کر دی گئی ہے۔ ڈی آئی جی آپریشنز کامران فیصل نے واقعے کا نوٹس لیتے ہوئے واضح کیا کہ سرِ راہ خواتین کو ہراساں کرنا اور تشدد کا نشانہ بنانا کسی طور ناقابلِ برداشت ہے۔ انہوں نے اعادہ کیا کہ خواتین کے خلاف جرائم میں ملوث عناصر سے آہنی ہاتھوں سے نمٹا جائے گا۔