غزہ میں اسرائیلی فضائی حملوں اور فائرنگ سے مزید 4 فلسطینی شہید

غزہ پٹی کے مختلف علاقوں میں اسرائیلی فوج کی جانب سے کی جانے والی تازہ ترین فائرنگ اور فضائی حملوں کے نتیجے میں خاتون سمیت کم از کم 4 فلسطینی شہید اور متعدد زخمی ہو گئے ہیں۔

عرب میڈیا اور حماس کے زیرِ انتظام وزارتِ داخلہ کے مطابق، غزہ شہر کے علاقے تل الہوا میں منشیات کنٹرول پولیس کی ایک گاڑی پر اسرائیلی ڈرون حملے کے نتیجے میں 1 اہلکار شہید اور دوسرا شدید زخمی ہوا۔ اس کے علاوہ جنوبی شہر خان یونس میں سائیکل پر سوار ایک فلسطینی، نصیرات پناہ گزین کیمپ کے قریب ایک شخص جبکہ شمالی غزہ کے جبالیہ کیمپ کے قریب اسرائیلی فوج کی مستقیم فائرنگ سے ایک خاتون شہید ہوئیں۔

اسرائیلی حکام نے الزام عائد کیا ہے کہ حماس جنگ بندی کی خلاف ورزی کرتے ہوئے دوبارہ عسکری صلاحیتیں بحال کر رہی ہے، جبکہ حماس نے ان دعووں کو یکسر مسترد کرتے ہوئے اسرائیل پر معاہدے کی مسلسل خلاف ورزی کا الزام لگایا ہے۔ واضح رہے کہ گزشتہ سال امریکی ثالثی میں ہونے والی جنگ بندی کے باوجود غزہ کی مکمل تعمیرِ نو اور اسرائیلی افواج کے حتمی انخلا پر اب تک اتفاقِ رائے نہیں ہو سکا ہے۔