سعودی اور عراقی وزراء خارجہ کا رابطہ، سکیورٹی بارے تعاون مضبوط بنانے پر تبادلہ خیال

سعودی عرب کے وزیرِ خارجہ شہزادہ فیصل بن فرحان اور عراق کے وزیرِ خارجہ فواد حسین کے درمیان ٹیلی فونک رابطہ ہوا، جس میں خطے کی موجودہ سیکورٹی صورتحال اور درپیش چیلنجز کے تناظر میں دوطرفہ سیکورٹی تعاون کو مزید مضبوط بنانے پر تفصیلی تبادلہ خیال کیا گیا۔

گفتگو کے دوران عراقی وزیرِ خارجہ فواد حسین نے سعودی عرب میں شہریوں اور شہری تنصیبات پر ہونے والے حالیہ حملوں کی سخت الفاظ میں مذمت کی۔ انہوں نے سعودی ہم منصب کو مکمل یقین دہانی کرائی کہ عراقی حکومت اپنی سرزمین کو سعودی عرب یا کسی بھی دیگر ہمسایہ ملک کے خلاف کسی قسم کی عسکری کارروائی یا حملوں کے لیے استعمال ہونے کی ہرگز اجازت نہیں دے گی۔

جواباً سعودی وزیرِ خارجہ شہزادہ فیصل بن فرحان نے علاقائی استحکام کی اہمیت پر زور دیتے ہوئے کہا کہ سعودی عرب خطے میں کشیدگی کم کرنے اور تمام ہمسایہ ممالک کے ساتھ تعاون بڑھانے کی تمام کوششوں کی بھرپور حمایت جاری رکھے گا۔