12 سال کی بچی کو بلیک میل کرنے پر 2 ملزمان کو 10،10 سال قید کی سزا

اسلام آباد کے ایڈیشنل ڈسٹرکٹ اینڈ سیشن جج محمد افضل مجوکہ نے سائبر کرائم سے متعلق کیس کا فیصلہ سنایا۔ عدالت نے انسدادِ سائبر کرائم قوانین کی مختلف شقوں کے تحت دونوں مجرمان کو سزا سنائی؛ سیکشن 22 کے تحت 7،7 سال قید اور 10 لاکھ روپے جرمانہ، جبکہ سیکشن 24 کے تحت دونوں ملزمان کو مزید 3،3 سال قید اور 10 لاکھ روپے جرمانے کی سزا کا حکم دیا گیا، یوں دونوں سزائیں ملا کر کل مدت 10 سال بنتی ہے۔

واضح رہے کہ اس افسوسناک واقعے کا مقدمہ متاثرہ کم سن بچی کے والد کی مدعیت میں نیشنل سائبر کرائم انویسٹی گیشن ایجنسی (NCCIA) نے درج کیا تھا، جس نے ٹھوس شواہد کی بنیاد پر مقدمے کی پیروی کرتے ہوئے ملزمان کو کیفرِ کردار تک پہنچایا۔