نئے انتظامی یونٹس اور 28 ویں آئینی ترمیم

پاکستان میں اقتدار کی نچلی سطح تک منتقلی اور نئے انتظامی یونٹس یا صوبوں کے قیام سے متعلق قومی سطح پر مباحثے شدید اور سنجیدہ رخ اختیار کر گئے ہیں۔ اسلام آباد کے اقتدار کے ایوانوں اور فکر و دانش کے فورمز پر اس بات پر مکمل اتفاقِ رائے پایا جا رہا ہے کہ ملک کا موجودہ گورننس ماڈل ناکام ہو چکا ہے اور اس کی بنیادی تنظیمِ نو (Restructuring) اب ناگزیر ہے۔

مباحثوں میں یہ بات سامنے آئی ہے کہ محض روایتی بلدیاتی انتخابات کروانا مسئلے کا حل نہیں، کیونکہ مسلم لیگ (ن)، پیپلز پارٹی اور پی ٹی آئی نے اقتدار میں رہتے ہوئے بلدیاتی نظام کو کبھی حقیقی اختیارات نہیں دیے۔ دوسری جانب پیپلز پارٹی سندھ کی تقسیم کی مخالفت کرتے ہوئے صرف جنوبی پنجاب اور گلگت بلتستان کو صوبہ بنانے کی حامی ہے، جبکہ مسلم لیگ (ن) میں وزیراعظم شہباز شریف نئے صوبوں کی حمایت میں ہیں لیکن نواز شریف گروپ فی الوقت خاموش ہے۔

اس تناظر میں خیبرپختونخوا کے 12 شورش زدہ اضلاع کو ایک الگ انتظامی و ٹیکنو کریٹک سیٹ اپ کے تحت چلانے کا تجربہ شروع کیا گیا ہے، جسے ملک میں نئے انتظامی ماڈل کا ‘پائلٹ پروجیکٹ’ قرار دیا جا رہا ہے۔ اس انتظامی سیٹ اپ کو 6 ماہ کا وقت دیا گیا ہے۔ مزید برآں، آئین کے آرٹیکل 239(4) کے تحت صوبائی اسمبلیوں کی دو تہائی اکثریت کی شرط سے بچنے کے لیے ڈویژنل سطح پر خودمختار انتظامی یونٹس بنانے کی تجویز بھی زیرِ غور ہے، جس کے لیے 28 ویں آئینی ترمیم اور این ایف سی (NFC) ایوارڈ کی شقوں میں تبدیلی کو ناگزیر قرار دیا جا رہا ہے