عمانی سلطان کا 44 سال بعد برطانیہ کا پہلا دورہ، شاہ چارلس نے حدیث پڑھ کر سنائی

برطانیہ کے شاہ چارلس نے عمان کے سلطان ہیثم بن طارق کا لندن آمد پر شاندار اور تاریخی استقبال کیا۔ واضح رہے کہ یہ 44 سال بعد کسی عمانی سلطان کا برطانیہ کا پہلا سرکاری اور ریاستی دورہ ہے۔

بکنگھم پیلس میں اپنے خصوصی خطاب کے دوران شاہ چارلس نے عمان کی عوام کی روایتی مہمان نوازی اور بلند اخلاق کو خراجِ تحسین پیش کرنے کے لیے صحیح مسلم کی مبارک حدیث عربی میں تلاوت کی، جس کا مفہوم ہے کہ: “اگر تم عمان کے لوگوں کے پاس جاتے تو وہ نہ تمہیں گالی دیتے اور نہ تمہیں مارتے۔” شاہ چارلس کی زبان سے عربی حدیث مبارکہ کی تلاوت پر تقریب کے تمام حاضرین بالخصوص عمانی وفد نے بے حد مسرت کا اظہار کیا۔

اپنے خطاب میں برطانیہ کے حکمران نے بین الاقوامی سطح پر بحرانوں کے حل اور علاقائی استحکام کے لیے مسقط کے کردار کو سراہا۔ شاہ چارلس نے آبنائے ہرمز (Strait of Hormuz) کو بحری تجارت کے لیے کھلوانے اور مشرقِ وسطیٰ میں مجموعی امن و امان کی بحالی کے لیے سلطان ہیثم بن طارق کی جانب سے کی جانے والی بہترین سفارتی کوششوں اور ثالثی کے کردار کی تعریف کی اور اسے عالمی امن کے لیے انتہائی اہم قرار دیا۔