یومِ فتحِ مظفرآباد آج منایا جا رہا ہے، کشمیریوں کی تاریخی جدوجہد کی یاد تازہ

آزاد جموں و کشمیر اور دنیا بھر میں مقیم کشمیری آج 22 اکتوبر کا دن ‘یومِ فتحِ مظفرآباد’ کے طور پر انتہائی عقیدت و احترام اور جوش و جذبے سے منا رہے ہیں، جو ڈوگرہ راج کے غاصبانہ اور جابرانہ تسلط کے خلاف کشمیریوں کی تاریخی اور فیصلہ کن جدوجہد کا یادگار دن ہے۔

آج ہی کے دن 22 اکتوبر 1947 کو پٹیالہ اور ڈوگرہ فورسز کے مظالم سے کشمیریوں کو نجات دلانے کے لیے قبائلی لشکر مقامی کشمیریوں کی مدد اور نصرت کے لیے مظفرآباد کی جانب بڑھے تھے۔ خورشید انور کی قیادت میں شروع ہونے والے اس تاریخی معرکے کے دوران ڈوگرہ فوج کی تمام تر دفاعی پوزیشنیں یکے بعد دیگرے تباہ ہو گئیں اور مجاہدین نے مظفرآباد سمیت ڈومیل کے اہم اسٹریٹجک مقامات کا مکمل کنٹرول حاصل کر لیا۔

مظفرآباد کی فتح ہی کی بدولت اوڑی، بارہمولہ اور سرینگر کی طرف پیش قدمی کی راہ ہموار ہوئی تھی۔ قبائلی لشکروں اور مقامی کشمیریوں کی یہ مشترکہ حریت پسندانہ جدوجہد کشمیریوں کی آزادی، لازوال قربانیوں اور حقِ خودارادیت کی تحریک میں سنگِ میل کی حیثیت رکھتی ہے۔