پاکستان سٹاک مارکیٹ میں تیزی، ہنڈرڈ انڈیکس 250 پوائنٹس بڑھ گیا

پاکستان اسٹاک ایکسچینج (PSX) میں آج کاروباری ہفتے کے چوتھے روز کے آغاز پر زبردست تیزی دیکھی جا رہی ہے اور مارکیٹ کا آغاز انتہائی مثبت زون میں ہوا ہے۔

ٹریڈنگ کے دوران سرمایہ کاروں کے زبردست اعتماد کے باعث 100 انڈیکس میں 250 پوائنٹس سے زائد کا اضافہ ریکارڈ کیا گیا، جس سے انڈیکس بڑھ کر 1 لاکھ 66 ہزار 180 پوائنٹس کی ریکارڈ سطح پر پہنچ گیا ہے۔ مارکیٹ ماہرین کے مطابق معاشی اشاریوں کی بہتری اور مثبت خبروں کی بدولت خریداروں کی جانب سے مسلسل دلچسپی دیکھنے میں آ رہی ہے۔

واضح رہے کہ گزشتہ روز بھی اسٹاک مارکیٹ میں مثبت رجحان غالب رہا تھا، جہاں کاروباری دن کے اختتام پر 100 انڈیکس 779 پوائنٹس کے نمایاں اضافے کے ساتھ 1 لاکھ 65 ہزار 930 پوائنٹس کی سطح پر بند ہوا تھا۔