محمد باقر کی مجتبیٰ خامنہ ای سے ملاقات، جنگ کی تازہ صورتحال پر تبادلہ خیال

ایران کی پارلیمنٹ (مجلس) کے اسپیکر محمد باقر قالیباف نے ایران کے سپریم لیڈر آیت اللہ مجتبیٰ خامنہ ای سے ایک اہم اعلیٰ سطحی ملاقات کی ہے، جس میں ملکی و علاقائی صورتحال پر تفصیلی تبادلہ خیال کیا گیا۔

ایرانی ذرائع کے مطابق دونوں رہنماؤں نے امریکہ اور اسرائیل کی جانب سے ایران کے خلاف مسلط کی گئی حالیہ جنگی صورتحال، سیکیورٹی خدشات اور اب تک کی دفاعی حکمتِ عملی کا باریک بینی سے جائزہ لیا۔ ملاقات کے دوران قومی یکجہتی اور عوامی اتحاد کے تحفظ میں اراکینِ پارلیمنٹ کے کردار، عوامی ریلیوں اور یکجہتی کے مظاہروں کے تسلسل کی ضرورت، معاشی چیلنجز سے نمٹنے کے لیے حکومت و پارلیمان کے باہمی تعاون، اور ایران کے سٹریٹجک اتحادی ممالک کے ساتھ تعلقات کی استواری پر زور دیا گیا۔

اس موقع پر اسپیکر محمد باقر قالیباف نے آیت اللہ مجتبیٰ خامنہ ای کو جنگ کے آغاز سے لے کر اب تک پارلیمنٹ کی کارکردگی، قانون سازی اور درپیش بحرانوں کا مقابلہ کرنے کے لیے تیار کردہ ہنگامی منصوبوں کے بارے میں تفصیلی بریفنگ پیش کی۔