دبئی میں او بی ایس گلوبل کی افتتاحی تقریب، عالمی کاروباری روابط کے نئے دور کا آغاز

دبئی میں او بی ایس گلوبل (OBS Global) کے زیرِ اہتمام ‘ون بزنس سیزن’ (One Business Season) کی شاندار افتتاحی تقریب منعقد ہوئی، جس میں 103 مختلف قومیتوں سے تعلق رکھنے والے نمائندوں نے شرکت کر کے عالمی یکجہتی، کاروباری تعاون اور ثقافتی ہم آہنگی کی ایک منفرد اور تاریخی مثال قائم کر دی۔

اس تقریب کی سب سے نمایاں خصوصیت 103 قومیتوں کے نمائندوں کا ایک ساتھ مل کر افتتاحی فیتہ (Ribbon) کاٹنا تھا، جسے منتظمین نے عالمی ریکارڈ نوعیت کا تاریخی لمحہ قرار دیا۔ تقریب میں شیخ عبدالحکیم المکتوم نے بطورِ خاص شرکت کی اور مختلف ممالک کے نمائندوں کے ہمراہ فیتہ کاٹ کر سیزن کا باقاعدہ افتتاح کیا۔ اس موقع پر کیک کاٹنے کی رسم، خصوصی ہارس شو، رنگارنگ ثقافتی و تفریحی پروگرامز اور اعزازی تقریب کا انعقاد بھی کیا گیا، جس میں نمایاں خدمات انجام دینے والی شخصیات کو ایوارڈز سے نوازا گیا۔

منتظمین کے مطابق او بی ایس گلوبل کا بنیادی مقصد دنیا بھر کے کاروباری رہنماؤں، سرمایہ کاروں اور نئے اسٹارٹ اپس کو ایک مشترکہ پلیٹ فارم پر متحد کرنا ہے تاکہ بین الاقوامی سطح پر تجارت اور باہمی روابط کے نئے مواقع پیدا کیے جا سکیں۔ اس ایونٹ نے دبئی کی بطور عالمی معاشی و ثقافتی مرکر شناخت کو مزید نمایاں کر دیا ہے۔