واشنگٹن نے مذاکرات کے دوران ایران پر 2 مرتبہ حملے کئے: اسماعیل بقائی

ایران کی وزارتِ خارجہ کے ترجمان اسماعیل بقائی نے امریکہ پر شدید تنقید کرتے ہوئے کہا ہے کہ واشنگٹن انتظامیہ نے نو ماہ سے بھی کم عرصے میں دو بار ایران پر براہِ راست حملے کیے اور یہ تمام تر جارحیت ایک ایسے وقت میں کی گئی جب سفارتی سطح پر مذاکرات کا عمل جاری تھا۔

سماجی رابطے کی ویب سائٹ ‘ایکس’ پر جاری بیان میں اسماعیل بقائی نے الزام عائد کیا کہ امریکہ نے میناب میں ایرانی بچوں اور لامرد میں بچیوں کا قتل عام کیا، ایرانی رہنماؤں کو نشانہ بنایا اور غریب عوام پر عائد معاشی پابندیوں کو مزید سخت کیا۔ انہوں نے مزید کہا کہ امریکہ نے 17 جون کو خود دستخط کی گئی مفاہمتی یادداشت (MoU) کو بھی یکطرفہ طور پر توڑ دیا اور اب الٹا دنیا سے مطالبہ کر رہا ہے کہ وہ ایران کی مذمت کرے۔

ایرانی ترجمان کا کہنا تھا کہ امریکی غیر قانونی جارحیت کی قیمت پوری دنیا کو خطے میں شدید عدم استحکام اور عالمی معیشت میں بے یقینی کی صورت میں ادا کرنا پڑ رہی ہے۔ انہوں نے واضح کیا کہ امریکہ اپنی مرضی سے جنگ شروع کرنے، خطے کو آگ میں جھونکنے اور عالمی سطح پر افراتفری پھیلانے کے بعد خود کو مظلوم ظاہر نہیں کر سکتا، اور جارح کو مدعی اور مظلوم کو مجرم بنا کر وہ اپنی تاریخی ذمہ داریوں سے فرار اختیار نہیں کر سکتا۔