امریکی شہر ٹولیڈو میں زہریلے کیمیکل کا ٹینک دھماکے سے پھٹ گیا

امریکی ریاست اوہائیو کے شہر ٹولیڈو میں زہریلے کیمیکل سے بھرا ایک بڑا ٹینک اچانک دھماکے سے پھٹ گیا، جس کے نتیجے میں ایک پولیس اہلکار زخمی ہو گیا جبکہ علاقے میں پھیلنے والے زہریلے مواد اور مزید دھماکوں کے خدشے کے پیشِ نظر 900 سے زائد رہائشیوں کو ہنگامی بنیادوں پر محفوظ مقامات پر منتقل کر دیا گیا ہے۔ امریکی میڈیا کے مطابق ساڑھے 5 ہزار گیلن کیمیکل کی گنجائش والے اس ٹینک میں دھماکے کی وجوہات تاحال معلوم نہیں ہو سکی ہیں، جبکہ ٹینک سے زہریلی گیس کے مسلسل اخراج کے باعث امدادی ٹیمیں جائے وقوعہ کے قریب جانے سے گریز کر رہی ہیں۔ حکام نے دھماکے کے مقام سے 1 میل کے دائرے کو مکمل خالی کرا لیا ہے اور 3 میل کے دائرے میں مقیم شہریوں کو گھروں کے اندر رہنے اور کھڑکیاں بند رکھنے کی ہدایت کی ہے۔ محکمہ صحت نے خبردار کیا ہے کہ اس زہریلی گیس کے اثرات سے آنکھوں، ناک اور جلد میں جلن ہو سکتی ہے، جبکہ علاقے میں چھائی شدید دھند کے باعث نگرانی کے امور میں بھی سخت مشکلات کا سامنا ہے۔