غزہ میں اسرائیلی فضائی حملے، میاں بیوی اور 17 سالہ نوجوان سمیت 4 فلسطینی شہید

غزہ پٹی میں اسرائیلی فوج کی جانب سے تازہ فضائی حملوں اور براہِ راست فائرنگ کے مختلف واقعات میں میاں بیوی اور 17 سالہ نوجوان سمیت 4 فلسطینی شہید ہو گئے ہیں۔

عرب میڈیا کے مطابق، غزہ شہر کے ایک رہائشی اپارٹمنٹ پر اسرائیلی جیٹ طیاروں کی بمباری سے اکرم یاسین اور ان کی اہلیہ دینا ابو بکر موقع پر ہی شہید ہو گئے۔ بعد ازاں اسرائیلی فوج نے دعویٰ کیا کہ اکرم یاسین حماس کے سیکیورٹی ونگ کے سینئر عہدیدار تھے۔ دوسری جانب، جنوبی غزہ کے علاقے خان یونس میں اسرائیلی فورسز کی فائرنگ سے ایک 17 سالہ نوجوان جامِ شہادت نوش کر گیا، جبکہ غزہ شہر کے مشرقی محلے ‘الزیتون’ میں بھی فائرنگ کے ایک واقعے میں ایک فلسطینی جان سے ہاتھ دھو بیٹھا۔

غزہ کے مقامی رہائشیوں نے اسرائیلی فورسز کی ان کارروائیوں پر شدید تشویش کا اظہار کرتے ہوئے کہا ہے کہ جنگ بندی کی مسلسل خلاف ورزیاں کی جا رہی ہیں اور ٹارگٹ کلنگ، ڈرون حملوں اور گولہ باری کا سلسلہ تھم نہ سکا۔ واضح رہے کہ معاہدۂ جنگ بندی کے آغاز سے لے کر اب تک غزہ میں اسرائیلی فائرنگ اور حملوں کے نتیجے میں 1,500 سے زائد فلسطینی شہید ہو چکے ہیں۔