امریکا کے ساتھ کشیدگی میں کمی کیلئے زیلنسکی کی اسٹیو وٹکوف سے ملاقات

یوکرین کے صدر ولادیمیر زیلنسکی نے امریکا اور کیف کے درمیان جاری شدید سفارتی اور عسکری کشیدگی کو کم کرنے کے لیے ناروے کے دارالحکومت اوسلو میں امریکی صدر ڈونلڈ ٹرمپ کے خصوصی نمائندے اسٹیو وٹکوف (Steve Witkoff) سے اہم ملاقات کی ہے۔

اوسلو میں ہونے والے ان اہم مذاکرات میں ناروے کے وزیراعظم یونس گاہ اسٹور اور فن لینڈ کے صدر الیگزینڈر اسٹب بھی شریک ہوئے، جبکہ امریکی نمائندے جیرڈ کشنر نے بیماری کی وجہ سے ویڈیو لنک کے ذریعے شرکت کی۔ امریکی انتظامیہ کی جانب سے روس کے لیے متوقع نرم رویے اور جنگ بندی کے لیے دباؤ پر کیف کی تشویش میں مسلسل اضافہ ہو رہا ہے۔ کیف حکام کا الزام ہے کہ واشنگٹن نے روسی میزائل حملوں کے بارے میں پیشگی انٹیلی جنس معلومات، ایئر ڈیفنس سسٹمز اور ڈرون آپریشنز کے لیے لازمی سیٹلائٹ کمیونیکیشن (اسٹار لنک) کی فراہمی میں رکاوٹیں پیدا کرنا شروع کر دی ہیں۔

دوسری جانب، یورپی ممالک واشنگٹن اور کیف کے درمیان بڑھتی ہوئی خلیج کو کم کرنے کی کوششوں میں مصروف ہیں، جبکہ کریملن نے امید ظاہر کی ہے کہ ناروے مذاکرات کے اختتام پر اسٹیو وٹکوف جلد ماسکو کا دورہ کر کے صدر ولادیمیر پیوٹن سے ملاقات کریں گے۔