ایران کا آبنائے ہرمز میں دو آئل ٹینکرز کو بارودی سرنگوں سے نشانہ بنانے کا دعویٰ

ایران کی پاسدارانِ انقلاب (IRGC) کی بحریہ نے دعویٰ کیا ہے کہ آبنائے ہرمز کے جنوبی حصے میں دو آئل ٹینکرز ایرانی بحری بارودی سرنگوں (Mines) سے ٹکرا کر شدید آگ کی لپیٹ میں آ گئے ہیں، جس کے بعد ان کی آمدورفت مکمل طور پر معطل ہو گئی ہے۔

خبر رساں ادارے (اے ایف پی) کے مطابق پاسدارانِ انقلاب نے اپنے سرکاری ترجمان پلیٹ فارم ‘سپاہ نیوز’ پر جاری بیان میں کہا کہ دونوں تجارتی آئل ٹینکرز ایک ایسے سمندری راستے سے گزرنے کی کوشش کر رہے تھے جسے تہران پہلے ہی غیر قانونی قرار دے چکا ہے۔ بارودی سرنگوں کے دھماکوں کے بعد دونوں جہازوں میں شدید آگ بھڑک اٹھی۔ تاہم ایرانی حکام نے واقعے کی تاریخ، متاثرہ ٹینکرز کے نام، ان پر لہرائے جانے والے پرچموں یا عملے کی ہلاکتوں کے حوالے سے مزید تفاصیل نہیں بتائیں۔

پاسدارانِ انقلاب نے مزید دعویٰ کیا ہے کہ ایرانی دفاعی نظام نے پیر کی رات ایک امریکی ڈرون کو بھی مار گرایا تھا، اگرچہ اس حوالے سے پینٹاگون یا امریکی حکام کا کوئی بیان سامنے نہیں آیا۔ واضح رہے کہ آبنائے ہرمز (Strait of Hormuz) عالمی سطح پر خام تیل کی ترسیل کی سب سے اہم ترین گزرگاہ ہے، جہاں کسی بھی قسم کی رکاوٹ سے عالمی توانائی کی مارکیٹ اور تیل کی قیمتوں میں شدید بحران پیدا ہونے کا اندیشہ ہے۔