اسحاق ڈار کا ایرانی اور مصری وزرائے خارجہ سے رابطہ، علاقائی صورتحال پر تبادلہ خیال

نائب وزیراعظم و وزیرِخارجہ اسحاق ڈار نے ایرانی اور مصری وزرائے خارجہ سے الگ الگ ٹیلیفونک رابطہ کر کے خطے کی مجموعی صورتحال اور او آئی سی (OIC) وزرائے خارجہ کونسل کے آئندہ اجلاس پر تفصیلی تبادلہ خیال کیا ہے۔ ترجمان دفترِ خارجہ کے مطابق ایرانی وزیرِخارجہ سے گفتگو کے دوران اسحاق ڈار نے علاقائی مسائل کے حل کے لیے مذاکرات کی اہمیت پر زور دیا۔ دوسری جانب مصری وزیرِخارجہ ڈاکٹر بدر عبدالعاطی سے بات چیت میں دونوں رہنماؤں نے سعودی عرب کی خودمختاری، سلامتی اور علاقائی سالمیت کی مکمل حمایت کا اعادہ کیا۔ اس موقع پر پاکستان، مصر، ترکیہ اور سعودی عرب کے درمیان ‘آر فور (R4) فریم ورک’ کے تحت باہمی تعاون بڑھانے اور علاقائی رابطہ کاری کے لیے جلد R4 اجلاس بلانے پر اتفاق کیا گیا۔