سان فرانسیسکو میں پاک امریکا ٹیک کنیکٹ 2026 کا انعقاد، ٹیکنالوجی تعاون پر اتفاق

امریکی ریاست کیلیفورنیا میں دنیا کے سب سے بڑے ٹیکنالوجی مرکز سلیکون ویلی (سان فرانسسکو) میں ’پاک امریکا ٹیک کنیکٹ 2026‘ کے تیسرے ایڈیشن کا شاندار آغاز ہو گیا ہے، جس میں امریکہ میں پاکستان کے سفیر رضوان سعید شیخ نے خصوصی شرکت کی اور کلیدی خطاب کیا۔

اس عالمی کانفرنس کا بنیادی مقصد پاکستان اور امریکہ کے درمیان ٹیکنالوجی، مصنوعی ذہانت (AI)، ڈیجیٹل انٹرپرائز اور جدید ترین شعبوں میں دوطرفہ تجارتی و معاشی تعلقات کو وسعت دینا ہے۔ کانفرنس میں دونوں ممالک کی سرکردہ آئی ٹی کمپنیوں کے نمائندوں، سرمایہ کاروں اور کاروباری شخصیات نے بڑی تعداد میں شرکت کی۔ تقریب کے دوران “پاکستان سے سلیکون ویلی تک: عالمی ٹیکنالوجی کمپنیوں کی تعمیر اور توسیع” کے موضوع پر ایک خصوصی پینل مباحثہ بھی ہوا جس میں پاکستانی آئی ٹی مصنوعات کے لیے امریکی منڈی تک رسائی کی حکمتِ عملی پر تفصیلی گفتگو کی گئی۔

پاکستانی سفیر رضوان سعید شیخ نے اپنے خطاب میں کہا کہ جدید ٹیکنالوجی میں سرمایہ کاری پاک امریکہ پائیدار معاشی تعلقات کا مرکزی ستون ہے۔ انہوں نے بیرونِ ملک مقیم پاکستانی نژاد امریکی آئی ٹی ماہرین اور سرمایہ کاروں پر زور دیا کہ وہ پاکستان کو ایک معیاری اور مسابقتی ٹیکنالوجی حب کے طور پر متعارف کرانے میں اپنا کردار ادا کریں۔ انہوں نے اعلان کیا کہ پاک امریکہ ٹیک کنیکٹ کا یہ سلسلہ محض سلیکون ویلی تک محدود نہیں رہے گا بلکہ 19 اکتوبر کو ڈیلاس، 21 اکتوبر کو واشنگٹن ڈی سی اور 23 اکتوبر کو شکاگو میں بھی ان کانفرنسوں کا انعقاد کیا جائے گا۔