راولپنڈی میں خاتون صحافی گولی لگنے سے جاں بحق، شوہر پولیس تحویل میں

راولپنڈی کے علاقے اڈیالہ روڈ پر نجی نیوز چینل سے وابستہ خاتون صحافی رابعہ احسن گولی لگنے کے پراسرار واقعے میں جاں بحق ہو گئی ہیں، جس کے بعد پولیس نے مقتولہ کے شوہر احسن کو تحویل میں لے لیا ہے۔ سی پی او راولپنڈی حسن مشتاق سکھیرا کے مطابق رابعہ احسن کی لاش گھر کے کمرے سے ملی ہے اور پولیس تمام قانونی و تفتیشی پہلوؤں کا جائزہ لے رہی ہے۔ پولیس ذرائع کا کہنا ہے کہ مقتولہ کو گردن کے قریب گولی لگی، جبکہ ابتدائی بیان میں شوہر نے اعتراف کیا ہے کہ فائر اس سے ہوا جو سیدھا مقتولہ کو جا لگا۔ مقتولہ 11 اور 13 سال کی دو بیٹیوں کی ماں تھیں، جبکہ واقعے کی اطلاع ملتے ہی ان کا بھائی بھی موقع پر پہنچ گیا ہے اور مقدمے کے اندراج کے لیے پولیس کو باقاعدہ درخواست جمع کرا دی گئی ہے۔