او آئی سی اجلاس شروع، عراقی وزیراعظم کی ثالثی کیلئے پاکستان کی ستائش

عراق کے دارالحکومت بغداد میں اسلامی تعاون تنظیم (OIC) کے وزرائے خارجہ کونسل کے 52ویں اجلاس کا باقاعدہ آغاز ہو گیا ہے، جس کے افتتاحی سیشن میں عراقی وزیراعظم نے خطے میں تنازعات کے حل اور ثالثی کے لیے پاکستان کے کلیدی کردار کی بے حد تعریف کی ہے۔

اجلاس کی افتتاحی تقریب سے خطاب کرتے ہوئے عراقی وزیراعظم محمد شیاع السودانی نے اسلامی ممالک کے درمیان یکجہتی، امن اور کشیدگی میں کمی کے لیے پاکستان کی مسلسل سفارتی کوششوں کو سراہا۔ انہوں نے خاص طور پر خطے میں جاری محاذ آرائی کے خاتمے اور ایران و امریکہ کے درمیان کشیدگی کو کم کرنے کے لیے پاکستان کے تعمیری اور ثالثانہ کردار کو خراجِ تحسین پیش کیا۔

او آئی سی اجلاس میں پاکستان کی جانب سے جدہ میں قائم پاکستان کے مستقل نمائندے فواد شیر شرکت کر رہے ہیں، جبکہ ایران، ترکیہ اور دیگر اہم مسلم ممالک کے وزرائے خارجہ اور مندوبین کی بڑی تعداد موجود ہے۔ اجلاس کا بنیادی مقصد مشرقِ وسطیٰ میں امن و امان کی صورتحال، معاشی چیلنجز اور امتِ مسلمہ کو درپیش سیکورٹی خدشات پر ایک متفقہ اور مؤثر لائحہ عمل تیار کرنا ہے۔