سان فرانسسکو؛ مغربی ساحل پر پاک-امریکا ٹیک کنیکٹ 2026 کا کامیاب انعقاد

امریکہ کے مشہور ٹیکنالوجی مرکز سان فرانسسکو کی سلیکون ویلی میں ‘پاک-امریکا ٹیک کنیکٹ 2026’ کے تیسرے ایڈیشن کا باقاعدہ اور کامیاب انعقاد ہوا، جہاں امریکہ میں پاکستان کے سفیر رضوان سعید شیخ نے ٹیکنالوجی، مصنوعی ذہانت (AI) اور ڈیجیٹل سرمایہ کاری کے شعبوں میں دونوں ممالک کے درمیان تعاون بڑھانے پر زور دیا۔

واشنگٹن میں پاکستانی سفارت خانے سے جاری اعلامیے کے مطابق اس اہم کانفرنس میں پاکستان کی نمایاں آئی ٹی کمپنیوں، معروف صنعت کاروں، وینچر کیپیٹلائسٹس اور امریکی کاروباری شخصیات نے بڑی تعداد میں شرکت کی۔ کانفرنس کے دوران پاکستانی آئی ٹی کمپنیوں کی امریکی منڈیوں تک براہِ راست رسائی، مصنوعی ذہانت، جدید ٹیکنالوجی کی انتقال اور مشترکہ سرمایہ کاری کے مواقع پر تفصیلی تبادلہ خیال کیا گیا۔

تقریب سے خطاب کرتے ہوئے سفیر رضوان سعید شیخ نے کہا کہ پاکستان کم لاگت، معیاری اور عالمی سطح پر مسابقتی ٹیکنالوجی خدمات فراہم کرنے کی بھرپور صلاحیت رکھتا ہے۔ انہوں نے سلیکون ویلی اور امریکی ویسٹ کوسٹ میں مقیم پاکستان نژاد امریکی ماہرین پر زور دیا کہ وہ پاکستان کو عالمی ٹیک میپ پر ایک اہم ڈیسٹینیشن کے طور پر متعارف کروانے میں اپنا کردار ادا کریں۔ سفیر نے سفارت خانے کی جانب سے امریکی اور پاکستانی کمپنیوں کے درمیان طویل المدتی شراکت داری کے فروغ کے لیے مکمل تعاون کا یقین دلایا۔