پی ایچ ایف نے قومی ٹیم کی اذلان شاہ کپ ہاکی ٹورنامنٹ میں شرکت کی تصدیق کردی

پاکستان ہاکی فیڈریشن (PHF) نے ملائیشیا میں منعقد ہونے والے معروف عالمی ایونٹ سلطان اذلان شاہ کپ ہاکی ٹورنامنٹ میں قومی سینئر ہاکی ٹیم کی شرکت کی باضابطہ تصدیق کر دی ہے۔

پاکستان ہاکی فیڈریشن کے صدر محی الدین وانی کے مطابق پاکستان نے ملائیشیا کی جانب سے دی گئی دعوت کو باضابطہ طور پر قبول کر لیا ہے، جس کے تحت قومی ٹیم نومبر میں اس اہم بین الاقوامی ایونٹ میں ایکشن میں نظر آئے گی۔ محی الدین وانی کا کہنا تھا کہ عالمی سطح کے مقابلوں میں باقاعدگی سے شرکت کرنے سے قومی کھلاڑیوں کو اعلیٰ درجے کا انٹرنیشنل ایکسپوژر اور تجربہ حاصل ہوگا جو پاکستان ہاکی کی بحالی میں مددگار ثابت ہوگا۔

اس حوالے سے پی ایچ ایف نے اپنے جاری کردہ بیان میں مزید بتایا کہ پاکستان انڈر 21 جونیئر ہاکی ٹیم پہلے ہی سلطان آف جوہر کپ میں شرکت کے لیے ملائیشیا پہنچ چکی ہے۔ فیڈریشن کے مطابق جونیئر اور سینئر دونوں سطحوں پر عالمی ٹورنامنٹس میں شرکت سے نوجوان کھلاڑیوں کو بین الاقوامی سطح پر اپنی صلاحیتوں کو پرکھنے اور پیش کرنے کا بھرپور موقع ملے گا۔