اٹلی: مہنگائی، ناقص عوامی خدمات کیخلاف احتجاج، جھڑپیں، شیلنگ، واٹر کینن کا استعمال

اٹلی کے مشہور تجارتی شہر میلان میں بڑھتی ہوئی مہنگائی اور ناقص عوامی خدمات کے خلاف ہونے والا احتجاج شدید پرتشدد رخ اختیار کر گیا، جس کے دوران مظاہرین اور پولیس کے درمیان سخت جھڑپیں ہوئیں۔

اطلاعات کے مطابق سیکڑوں نقاب پوش مظاہرین نے میلان کے مرکزی تجارتی علاقے ‘پیاتسا ڈوومو’ کے قریب ہنگامہ آرائی کرتے ہوئے دکانوں کے شیشے توڑ دیے، متعدد دکانوں میں لوٹ مار کی اور سڑکوں پر موجود کچرے کے ڈبوں کو آگ لگا دی۔ سیکورٹی اہلکاروں پر پتھراؤ کے جواب میں پولیس نے ہجوم کو منتشر کرنے کے لیے آنسو گیس اور واٹر کینن کا شدید استعمال کیا۔ پولیس نے موقع سے 60 سے زائد مظاہرین کو حراست میں لے کر تفتیش کے لیے منتقل کر دیا ہے۔

پولیس رپورٹ کے مطابق اس سے ایک روز قبل بھی میلان، بولوگنا، بریشیا، برگامو اور تورین سمیت شمالی اٹلی کے مختلف شہروں میں پرتشدد جھڑپوں کے دوران 28 مظاہرین کو گرفتار کیا گیا تھا۔ اطالوی وزیراعظم جارجیا میلونی نے تشدد کے ان واقعات کی سخت الفاظ میں مذمت کرتے ہوئے ہنگامی حکومتی اجلاس طلب کر لیا ہے جس میں صورتِ حال پر قابو پانے کے لیے اہم اقدامات کی منظوری دی جائے گی۔ واضح رہے کہ اٹلی میں یہ احتجاجی لہر ایسے وقت میں سامنے آئی ہے جب پڑوسی ملک فرانس میں بھی گرانی اور ناقص عوامی سروسز کے خلاف وسیع پیمانے پر بدامنی دیکھی جا رہی ہے۔