کے پی حکومت مولانا کے بغیر چلے گی اور ترقی بھی کرے گی: گورنر فیصل کنڈی

گورنر خیبر پختونخوا فیصل کریم کنڈی نے جمعیت علمائے اسلام (ف) کے سربراہ مولانا فضل الرحمٰن کے حالیہ بیانات کا جواب دیتے ہوئے کہا ہے کہ “مولانا کہتے تھے کہ ان کے بغیر نہ کوئی حکومت بنتی ہے اور نہ چلتی ہے، لیکن میں انہیں بتانا چاہتا ہوں کہ آپ کے بغیر خیبر پختونخوا کی حکومت بنی بھی ہے اور چلے گی بھی۔”

پشاور میں ذرائع ابلاغ کے نمائندوں سے گفتگو کرتے ہوئے گورنر کے پی کا کہنا تھا کہ مولانا فضل الرحمٰن کی گزشتہ روز کی تقریر سے انہیں شدید مایوسی ہوئی کیونکہ ایک سینئر سیاستدان سے ایسے مؤقف کی توقع نہیں تھی۔ انہوں نے صوبے میں گورنر راج کی مخالفت پر مولانا کے بیانات کو مسترد کرتے ہوئے کہا کہ اگر صوبائی حکومت امن و امان قائم کرنے میں مکمل ناکام ہو چکی ہے اور مولانا خود اپنے علاقے میں آزادانہ گھوم پھر نہیں سکتے، تو پھر اس پر خاموشی اختیار کرنا سمجھ سے باہر ہے۔

فیصل کریم کنڈی نے سابقہ دورِ حکومت کو شدید تنقید کا نشانہ بناتے ہوئے دعویٰ کیا کہ کے پی کے کی سابقہ حکومت کے فیصلے اسلام آباد کے بجائے کابل اور قندھار سے آتے تھے، جبکہ مفرور عناصر سرحد پار سے بیٹھ کر حالات خراب کر رہے ہیں۔ انہوں نے مزید کہا کہ لکی مروت، بنوں اور ٹانک سمیت پورے صوبے کے معدنی وسائل کو مقامی اور غير ملکی کمپنیوں کی مشترکہ سرمایہ کاری سے بروئے کار لانا ہوگا اور صوبے میں امن و امان کے قیام پر کسی قسم کا سمجھوتا نہیں کیا جائے گا۔