او آئی سی وزرائے خارجہ کونسل کا اجلاس آج بغداد میں ہوگا، اسحاق ڈار شرکت نہیں کریں گے

اسلامی تعاون تنظیم (OIC) کی وزرائے خارجہ کونسل کا 52واں اجلاس آج عراق کے دارالحکومت بغداد میں منعقد ہو رہا ہے، جس میں خطے میں بڑھتی ہوئی کشیدگی، علاقائی امن و سلامتی اور امتِ مسلمہ کو درپیش اہم مسائل پر تفصیلی تبادلہ خیال کیا جائے گا۔

پاکستان کے نائب وزیراعظم اور وزیرِ خارجہ سینیٹر محمد اسحاق ڈار ملک میں اہم مصروفیت اور پیش آمدہ امور کے باعث اس اجلاس میں ذاتی طور پر شرکت نہیں کر رہے ہیں۔ سفارتی ذرائع کے مطابق جدہ میں او آئی سی کے لیے پاکستان کے مستقل نمائندے فواد شیر اجلاس میں پاکستانی وفد کی نمائندگی کریں گے۔

اجلاس میں شرکت کے لیے ایرانی وزیر خارجہ عباس عراقچی سمیت ترکیہ، مصر اور دیگر اہم مسلم ممالک کے اعلیٰ حکام بغداد پہنچ چکے ہیں۔ یہ اہم اجلاس ایک ایسے وقت میں ہو رہا ہے جب مشرقِ وسطیٰ میں جنگی اور سیاسی کشیدگی عروج پر ہے، اور تمام رکن ممالک خطے میں پائیدار امن، تنازعات کے سفارتی حل اور باہمی تعاون کو فروغ دینے کے لیے مشترکہ لائحہ عمل پر غور کریں گے۔