خلیج میں توانائی تنصیبات پر حملے پاکستانی معیشت کیلئے تشویش کا باعث ہیں: وزیر خزانہ

وفاقی وزیرِ خزانہ محمد اورنگزیب نے کہا ہے کہ مشرقِ وسطیٰ میں جاری کشیدگی اور ایران جنگ کے باعث توانائی کی بڑھتی ہوئی عالمی قیمتوں کے ابتدائی اثرات سے پاکستان اب تک مؤثر انداز میں نمٹنے میں کامیاب رہا ہے، تاہم خلیجی ممالک میں توانائی کے بنیادی ڈھانچے پر حملے ملکی معیشت کے طویل المدتی منظرنامے کے لیے شدید تشویش کا باعث ہیں۔

تھائی لینڈ کے دارالحکومت بینکاک میں آئی ایم ایف (IMF) اور ورلڈ بینک کے سالانہ اجلاسوں کے موقع پر عالمی ذرائع ابلاغ کو انٹرویو دیتے ہوئے وزیرِ خزانہ نے بتایا کہ پاکستان نے نومبر تک کے لیے ایندھن اور توانائی کی تمام ضروریات کا پہلے سے انتظام کر رکھا ہے اور اب موسمِ سرما کے لیے جامع منصوبہ بندی کی جا رہی ہے۔ انہوں نے واضح کیا کہ ملک میں ایندھن کی کوئی کمی پیدا نہیں ہوئی اور نہ ہی پمپس پر قطاریں دیکھنے کو ملیں، تاہم حکومت غیر ضروری طور پر مہنگی ایل این جی (LNG) کی سپاٹ خریداری سے گریزر کرے گی۔

وزیرِ خزانہ محمد اورنگزیب نے توانائی کی تنصیبات پر حملوں کو معاشی بحالی میں سب سے بڑی رکاوٹ قرار دیتے ہوئے کہا کہ خلیج اور بالخصوص سعودی عرب کے توانائی انفراسٹرکچر کو نشانہ بنائے جانے سے حالات معمول پر آنے میں طویل وقت لگ سکتا ہے۔ معاشی اصلاحات پر گفتگو کرتے ہوئے انہوں نے کہا کہ حکومت مالیاتی نظم و ضبط، ٹیکس چوری کے خاتمے اور محصولات میں اضافے کی پالیسی پر سختی سے عمل پیرا ہے، تاہم مفاداتی گروہوں اور بعض نجی کاروباروں کی جانب سے اصلاحاتی ایجنڈے کے خلاف شدید مزاحمت کا سامنا ہے۔