خیبرپختونخوا میں گورنر راج غیر آئینی ہے، پرامن اور قانونی جدوجہد جاری رکھیں گے: محمود خان اچکزئی Slug:

تحریکِ تحفظِ آئینِ پاکستان کے سربراہ اور قومی اسمبلی میں قائدِ حزبِ اختلاف محمود خان اچکزئی نے پشاور ہائیکورٹ کے باہر میڈیا سے گفتگو کرتے ہوئے خیبر پختونخوا میں گورنر راج کے نفاذ کو مکمل طور پر غیر قانونی اور غیر آئینی قرار دے کر شدید مذمت کی ہے۔

محمود خان اچکزئی نے بتایا کہ وہ اور ان کے اتحادی پشاور ہائیکورٹ میں صوبے کے ساتھ ہونے والے مظالم اور غیر قانونی گورنر راج کے خلاف آئینی درخواستیں دائر کرنے اور اظہارِ یکجہتی کے لیے آئے ہیں۔ انہوں نے کہا کہ خیبر پختونخوا میں عوام نے پی ٹی آئی کو واضح مینڈیٹ دیا تھا، مگر اب بندوق کے زور پر منتخب حکومت سے اقتدار چھینا جا رہا ہے۔ انہوں نے ماضی کے انتخابات، پی ٹی آئی سے انتخابی نشان چھیننے اور اراکین کو دی جانے والی سخت سزاؤں پر تنقید کرتے ہوئے کہا کہ ملک میں قاتلوں کی سزا بھی اتنی نہیں ہوتی جتنی سیاسی اراکین کو سنائی گئی ہیں۔

فاٹا انضمام کا ذکر کرتے ہوئے اپوزیشن لیڈر نے کہا کہ انہوں نے اس وقت بھی فاٹا کے غلط طریقہ کار سے انضمام کی مخالفت کی تھی۔ انہوں نے واضح کیا کہ عوام کے حقوق پر بزورِ طاقت قبضہ کرنے کی کوشش کی جا رہی ہے، تاہم اپوزیشن نے پرتشدد راستہ اختیار نہ کرنے اور آئینی و قانونی جدوجہد کے ذریعے حق کی جنگ لڑنے کا فیصلہ کیا ہے۔