بنوں پولیس کو دہشتگردی سے نمٹنے کیلئے جدید بلٹ پروف گاڑیاں فراہم

وفاقی وزیرِ داخلہ محسن نقوی کی خصوصی ہدایت پر خیبرپختونخوا کے حساس ضلع بنوں کے لیے فراہم کردہ جدید بلٹ پروف گاڑیاں بنوں پولیس لائن پہنچا دی گئی ہیں، جن کا مقصد دہشت گردی کے خلاف برسرِ پیکار پولیس فورس کو اعلیٰ سطح کی سیکیورٹی فراہم کرنا ہے۔

پولیس حکام کے مطابق ان جدید ترین بلٹ پروف گاڑیوں کی نفاذ سے بنوں پولیس کی آپریشنل صلاحیتوں میں نمایاں اضافہ ہوگا اور سیکیورٹی اہلکاروں کو دہشت گردوں کے خلاف مؤثر اور بروقت کارروائیوں کے دوران خطرات سے تحفظ میسر آئے گا۔

حکام نے بتایاکہ ضلع بنوں اور گردونواح میں امن و امان کے قیام، پائیدار امن کی بحالی اور شہریوں کے جانی و مالی تحفظ کو یقینی بنانے کے لیے فورس کو جدید ترین ہتھیاروں، سہولیات اور وسائل سے آراستہ کرنے کا سلسلہ بلا تعطل جاری رکھا جائے گا۔