بی آر ٹی پشاور کیلئے مزید 27 نئی بسیں پہنچ گئیں

پشاور بس ریپڈ ٹرانزٹ (BRT Peshawar) کے مسافروں کے لیے بڑی خوشخبری سامنے آئی ہے، جہاں مزید 27 نئی بسیں آج صبح چمکنی ڈپو پہنچ گئی ہیں۔ اس کے ساتھ ہی منصوبے کے لیے آرڈر کی گئی تمام 52 نئی بسوں کی پشاور ترسیل کامیابی سے مکمل ہو گئی ہے۔

فلیٹ کے آپریٹر ٹرانس پشاور (TransPeshawar) کے مطابق گزشتہ ماہ 25 بسیں پشاور پہنچائی گئی تھیں اور اب نئی بسوں کی شمولیت کے بعد بی آر ٹی پشاور کے کل بسوں کے بیڑے (Fleet) کی تعداد بڑھ کر 296 ہو گئی ہے۔ حکام نے بتایا کہ بسوں کی اس نئی کھیپ سے موجودہ روٹس پر بھیڑ کم ہوگی، سفری سہولیات میں بہتری آئے گی اور شہر میں نئے روٹس شروع کرنے میں بھی مدد ملے گی۔

دوسری جانب، ٹرانس پشاور نے سوشل میڈیا پر ان بسوں کی نقل و حرکت کے حوالے سے پھیلائی جانے والی ان افواہوں اور ویڈیوز کی سختی سے تردید کی ہے جن میں دعویٰ کیا جا رہا تھا کہ بسوں کو پشاور سے باہر منتقل کیا جا رہا ہے۔ ادارے نے واضح کیا کہ یہ تمام دعوے من گھڑت اور گمراہ کن تھے، جبکہ تمام 52 بسوں کی چمکنی ڈپو میں موجودگی نے ان غلط افواہوں کا خاتمہ کر دیا ہے۔