پنجاب اے آئی دور میں داخل جبکہ خیبرپختونخوا پتھر کے دور میں ہے: مریم نواز

وزیراعلیٰ پنجاب مریم نواز نے ساہیوال میں طلبہ میں لیپ ٹاپس اور اسکوٹیز کی تقسیم کی تقریب سے خطاب کرتے ہوئے سیاسی مخالفین اور خیبرپختونخوا حکومت پر شدید تنقید کرتے ہوئے کہا ہے کہ “آج پنجاب آرٹیفیشل انٹیلی جنس (AI) کے دور میں داخل ہو رہا ہے تو خیبرپختونخوا پتھر کے دور میں ہے”۔

اپنے خطاب میں وزیراعلیٰ نے کہا کہ جن کا دعویٰ تھا کہ انہوں نے عوام کو شعور دیا، حقیقت میں انہوں نے لوگوں کی زندگیاں تباہ کیں۔ انہوں نے پی ٹی آئی پر طنز کرتے ہوئے کہا کہ ان کی حکومت کسی اور نے ختم نہیں کی بلکہ ان کے اپنے اقدامات اور لانگ مارچ نے ان کی حکومت کو ختم کیا۔ اب خیبرپختونخوا کے لوگوں کو اندازہ ہوگا کہ حقیقی ترقی اور خدمت کا جذبہ کیا ہوتا ہے۔

مریم نواز نے پنجاب میں تعلیمی و ترقیاقی اقدامات کی تفصیلات بتاتے ہوئے اعلان کیا کہ صوبے کی تمام تحصیلوں میں 3,000 الیکٹرک بسیں چلائی جائیں گی جن کا کرایہ صرف 20 روپے برقرار رکھا گیا ہے۔ اس کے علاوہ طالبات کو فراہم کی جانے والی اسکوٹیز کی آسان قسط صرف 3,000 روپے رکھی گئی ہے۔ انہوں نے واضح کیا کہ پنجاب کی تمام یونیورسٹیز میں میرٹ پر وائس چانسلرز کی تعیناتی کی گئی ہے اور صحت کی سہولیات و ادویات شہریوں کی دہلیز تک پہنچائی جا رہی ہیں۔