بسنت کے 10 روزہ انعقاد کے خلاف درخواست مسترد

لاہور ہائیکورٹ نے فروری 2027ء میں 10 روزہ بسنت کا تہوار منانے کے حکومتی اعلانات کے خلاف دائر کی گئی درخواست کو وقت سے پہلے اور غیر ضروری قرار دیتے ہوئے مسترد کر دیا ہے۔

جسٹس شہرام سرور چوہدری نے شہری شاہد اسلام کی جانب سے دائر درخواست پر سماعت کی۔ سماعت کے دوران فاضل جج نے استفسار کیا کہ کیا درخواست گزار کے پاس حکومت کا وہ باقاعدہ نوٹیفکیشن موجود ہے جس کے تحت 2027ء میں 10 روزہ بسنت منانے کا فیصلہ کیا گیا ہے؟ عدالت نے ریمارکس دیے کہ صرف خبروں یا ویب سائٹ کی دستاویزات پر حکمِ امتناع جاری نہیں کیا جا سکتا۔ متعلقہ نوٹیفکیشن کے بغیر یہ طے کرنا ممکن نہیں کہ بنیادی انسانی حقوق متاثر ہو رہے ہیں۔

درخواست گزار کے وکیل نے مؤقف اپنایا تھا کہ سال 2026ء میں بسنت کے موقع پر متعدد ہلاکتیں ہوئی تھیں اور 2027ء کے لیے 10 روزہ بسنت کا دورانیہ کم کر کے صرف ایک دن کیا جائے یا اس فیصلے کو کالعدم قرار دیا جائے۔ لاہور ہائیکورٹ نے نوٹیفکیشن نہ ہونے کی بنا پر درخواست مسترد کرتے ہوئے درخواست گزار کو متعلقہ سرکاری نوٹیفکیشن لف کر کے دوبارہ درخواست دائر کرنے کی ہدایت کر دی۔