انمول عرف پنکی مزید 2 مقدمات میں بری، عدالت کا رہائی کا حکم

ایڈیشنل ڈسٹرکٹ اینڈ سیشن جج کی عدالت نے مبینہ منشیات ڈیلر انمول عرف پنکی کو منشیات فروشی اور سہولت کاری کے مزید 2 مقدمات سے عدم ثبوت کی بنیاد پر بری کرتے ہوئے فوری رہا کرنے کا حکم جاری کر دیا ہے۔

سماعت کے دوران پراسیکیوشن عدالت کے سامنے ملزمہ کے خلاف شواہد اور دلائل پیش کرنے میں مکمل طور پر ناکام رہی، جس پر عدالت نے بریت کی درخواست منظور کر لی۔ عدالت نے اپنے فیصلے میں واضح کیا کہ اگر ملزمہ کسی اور مقدمے میں نامزد یا مطلوب نہیں ہے تو اسے فوراً جیل سے رہا کیا جائے۔

واضح رہے کہ ملزمہ انمول عرف پنکی کے خلاف پہلی بار سال 2018ء میں کاؤنٹر ٹیررازم ڈیپارٹمنٹ (CTD) میں مقدمہ درج کیا گیا تھا، اور حالیہ فیصلے کے بعد اب تک عدالتیں اسے مجموعی طور پر 5 مختلف مقدمات سے بری کر چکی ہیں۔