بیرسٹر گوہر کا عمران خان کے آفیشل ایکس اکاؤنٹ سے اظہار لاتعلقی

پاکستان تحریکِ انصاف (پی ٹی آئی) کے چیئرمین بیرسٹر گوہر علی خان نے بانی پی ٹی آئی عمران خان کے آفیشل ‘ایکس’ (سابقہ ٹوئٹر) اکاؤنٹ سے آن ریکارڈ لاتعلقی کا اظہار کر دیا ہے۔

اسلام آباد ہائی کورٹ کے فاضل جج جسٹس ارباب محمد طاہر نے ایک شہری غلام مرتضیٰ ایڈووکیٹ کی جانب سے دائر کی گئی اس درخواست پر سماعت کی جس میں بانی پی ٹی آئی کے ایکس اکاؤنٹ کو بلاک اور بند کرنے کی استدعا کی گئی ہے۔ سماعت کے موقع پر چیئرمین پی ٹی آئی بیرسٹر گوہر علی خان، بانی پی ٹی آئی کے وکلاء خالد یوسف چوہدری، شمسہ کیانی اور نیشنل کاؤنٹر کرائم انویسٹی گیشن ایجنسی (NCCIA) کے حکام عدالت میں پیش ہوئے۔

سماعت کے دوران جسٹس ارباب محمد طاہر نے بیرسٹر گوہر سے مکالمہ کرتے ہوئے فرمایا کہ عدالت نے انہیں ذاتی حیثیت میں طلب نہیں کیا تھا بلکہ صرف تحریری جواب بھجوانے کی ہدایت کی تھی۔ اس پر چیئرمین پی ٹی آئی بیرسٹر گوہر علی خان نے واضح کیا کہ پی ٹی آئی بانی پی ٹی آئی کے اس آفیشل ایکس اکاؤنٹ کو آن ریکارڈ کلیم (ملکیت ظاہر) نہیں کرتی۔ بیرسٹر گوہر نے مؤقف اختیار کیا کہ اب حالات تبدیل ہو چکے ہیں، اس لیے تفصیلی جواب داخل کرنے کے لیے کچھ وقت عنایت کیا جائے۔ فاضل جج نے استدعا منظور کرتے ہوئے تحریری جواب جمع کرانے کے لیے مہلت دے دی اور کیس کی سماعت 23 نومبر 2026 تک ملتوی کر دی۔