پشاور میں سکول کی چھت گرنے سے خاتون ٹیچر اور 17 بچے جاں بحق

پشاور کے علاقے دیر کالونی میں ایک انتہائی افسوسناک اور دردناک حادثے کے نتیجے میں اسکول کی خستہ حال چھت اچانک زمین بوس ہو گئی، جس کے نتیجے میں ایک خاتون ٹیچر اور 17 معصوم بچے جاں بحق جبکہ متعدد شدید زخمی ہو گئے۔

ریسکیو 1122 کے مطابق یہ سانحہ دیر کالونی میں کالج روڈ پر واقع ایک اسکول میں پیش آیا۔ اطلاع ملتے ہی ریسکیو ٹیمیں موقع پر پہنچیں اور امدادی کارروائیاں شروع کر دیں۔ ترجمان لیڈی ریڈنگ ہسپتال (LRH) محمد عاصم نے تصدیق کی کہ 17 بچوں اور ایک خاتون ٹیچر کی لاشوں کو ہسپتال لایا گیا ہے، جبکہ تمام جاں بحق بچوں کی عمریں 13 سال تک ہیں۔ ہسپتال میں فوری طور پر ایمرجنسی نافذ کر دی گئی ہے اور شدید زخمی بچوں کو ٹراما سینٹر میں طبی امداد فراہم کی جا رہی ہے، جن میں سے چند کی حالت تشویشناک بتائی جاتی ہے۔

ریسکیو حکام کے مطابق اسکول کی عمارت کا ملبہ ہٹانے اور مزید بچوں یا عملے کی تلاش کے لیے سرچ آپریشن تاحال جاری ہے۔ دوسری جانب مشیرِ اطلاعات ثمر ہارون بلور نے واقعے پر گہرے دکھ اور افسوس کا اظہار کرتے ہوئے متاثرہ خاندانوں سے تعزیت کی ہے۔ انہوں نے ہسپتال انتظامیہ کو زخمیوں کو بہترین طبی سہولیات فراہم کرنے اور ریسکیو ٹیموں کو تمام دستیاب وسائل کے ذریعے امدادی کارروائیاں تیز کرنے کی ہدایت کی ہے۔