ہماری ترقی صلاحیتوں کے مطابق محدود، کسی بھی ضلع کی کارکردگی اچھی نہیں: میاں عامر محمود

دنیا میڈیا گروپ کے چیئرمین میاں عامر محمود نے پاکستان ایڈمنسٹریٹو سروسز (PAS) اکیڈمی میں زیرِ تربیت افسران سے خطاب کرتے ہوئے ملک میں فوری گورننس ریفارمز اور چھوٹے انتظامی یونٹس (صوبوں) کے قیام پر زور دیا ہے۔

ان کا کہنا تھا کہ ہم پاکستان کی تقسیم کی بات نہیں کرتے بلکہ 25 کروڑ عوام کی زندگی آسان بنانے کے لیے انتظامی اصلاحات کا مطالبات کر رہے ہیں، کیونکہ ملک کا کوئی بھی ضلع اچھے نتائج نہیں دے رہا۔ انہوں نے تجویز دی کہ اگر ہر ڈویژن کو صوبہ بنا دیا جائے تو پنجاب میں 10، سندھ میں 7، خیبر پختونخوا میں 8 اور گلگت بلتستان سمیت بلوچستان و دیگر علاقوں میں متوازن انتظامی تقسیم سے گورننس بہتر ہو سکتی ہے۔

میاں عامر محمود نے انسانی ترقی کے اشاریوں اور تعلیم و صحت کی ابتر صورتحال پر شدید تشویش کا اظہار کرتے ہوئے انکشاف کیا کہ پاکستان دنیا بھر میں سکولوں سے باہر بچوں کی تعداد میں پہلے نمبر پر ہے اور 40 فیصد بچوں کی نشوونما (Stunting) درست نہیں ہو پا رہی۔ انہوں نے مزید کہا کہ پنجاب واحد صوبہ ہے جو این ایف سی ایوارڈ میں اپنا شیئر دیگر صوبوں کو دیتا ہے، مگر اس کے باوجود مسائل حل نہیں ہو رہے۔ انہوں نے عدالتی و پولسنگ نظام کی خامیوں اور تعلیمی بدحالی پر قابو پانے کے لیے تمام حصوں کو مساوی ترقی دینے پر زور دیا۔