پاک فوج کی ٹیم نے کیمبرین پٹرول مقابلے میں سلور میڈل جیت لیا

برطانیہ میں منعقد ہونے والے دنیا کے مشکل ترین اور معتبر ترین فوجی مقابلوں میں سے ایک کیمبرین پٹرول 2026 (Cambrian Patrol 2026) میں پاک فوج کی ٹیم نے شاندار کارکردگی کا مظاہرہ کرتے ہوئے چاندی کا تمغہ (Silver Medal) اپنے نام کر لیا ہے۔

یہ مشقیں برطانیہ کے علاقے ویلز (Wales) میں 2 سے 13 اکتوبر 2026 تک جاری رہیں، جن میں دنیا بھر کے 36 ممالک کی 140 عسکری ٹیموں نے حصہ لیا۔ رواں سال بین الاقوامی مقابلے میں پاکستان کی نمائندگی پاک فوج کی 59 پنجاب رجمنٹ نے کی، جس میں ایک افسر اور 7 سپاہیوں پر مشتمل 8 رکنی دستے نے حصہ لیا اور سخت ترین پیشہ ورانہ مراحل کامیابی سے طے کرتے ہوئے میڈل حاصل کیا۔

پاک فوج کی اس کامیابی کے اعتراف میں لندن میں واقع پاکستانی ہائی کمیشن کی جانب سے سلور میڈل جیتنے والے فوجی دستے کے اعزاز میں ایک پروقار استقبالیہ تقریب کا اہتمام کیا گیا، جہاں ہائی کمشنر اور سینئر حکام نے جوانوں کی پیش ورانہ مہارت اور ملک و قوم کا نام روشن کرنے پر انہیں سراہا۔ کیمبرین پٹرول کو دنیا بھر میں عسکری گشت، جسمانی لچک اور حکمتِ عملی کے امتحان کے لحاظ سے سخت ترین چیلنج مانا جاتا ہے۔