آبنائے ہرمز پر مکمل کنٹرول، ایران کیخلاف جاری جنگ جلد ختم ہوجائے گی: ٹرمپ کا دعویٰ

امریکی صدر ڈونلڈ ٹرمپ نے دعویٰ کیا ہے کہ امریکہ نے اہم تجارتی و بحری گزرگاہ آبنائے ہرمز (Strait of Hormuz) پر مکمل کنٹرول حاصل کر لیا ہے اور ایران کے خلاف جاری فوجی تنازع اور جنگ بہت جلد ختم ہو جائے گی۔

امریکی ریاست ایریزونا کے شہر بل ہیڈ سٹی (Bullhead City) میں ایک بڑے عوامی اجتماع سے خطاب کرتے ہوئے ڈونلڈ ٹرمپ نے دعویٰ کیا کہ شدید امریکی حملوں کے نتیجے میں ایران اپنی بحریہ، فضائیہ، ریڈار سسٹم اور فضائی دفاعی صلاحیتوں سے مکمل محروم ہو چکا ہے۔ انہوں نے مزید کہا کہ ایرانی قیادت کی پہلی اور دوسری سطح ختم کی جا چکی ہے جبکہ تیسری سطح کے بھی نصف رہنما ہلاک ہو چکے ہیں۔ ان کا کہنا تھا کہ بعض شخصیات نے ان سے مزید حملے نہ کرنے کی درخواست کی تھی جس پر انہوں نے عمل کیا۔

تاہم، امریکی صدر نے اشارہ دیا کہ ان شدید فوجی حملوں کے بعد تہران کے ساتھ سفارتی مذاکرات کا عمل مزید پیچیدہ ہو گیا ہے۔ انہوں نے یہ بھی تسلیم کیا کہ اس تنازع کے باعث عالمی سطح پر ایندھن کی قیمتوں میں توقع سے زیادہ اضافہ ہوا ہے، لیکن جنگ کے خاتمے کے بعد پٹرولیم مصنوعات کی قیمتیں تیزی سے نیچے آ جائیں گی۔