سہیل آفریدی کی نااہلی سے متعلق درخواست غیر مؤثر ہونے پر نمٹا دی گئی

وفاقی آئینی عدالت نے سابق وزیراعلیٰ خیبر پختونخوا سہیل آفریدی کی نااہلی اور تقرری کے خلاف دائر درخواست کو غیر مؤثر قرار دیتے ہوئے نمٹا دیا ہے۔

چیف جسٹس امین الدین خان کی سربراہی میں سماعت کے دوران عدالت نے ریمارکس دیے کہ خیبر پختونخوا میں ایمرجنسی اور گورنر راج کے نفاذ کے بعد سہیل آفریدی اب وزیراعلیٰ کے منصب پر فائز نہیں رہے، جس کے باعث یہ کیس اس وقت محض ایک نظریہ (اکیڈمک سوال) کی حد تک رہ گیا ہے۔ چیف جسٹس نے واضح کیا کہ موجودہ سیاسی و آئینی پیش رفت کے بعد اس درخواست پر مزید کارروائی آگے نہیں بڑھائی جا سکتی۔

سماعت کے دوران درخواست گزار شیر افضل مروت نے مؤقف اختیار کیا کہ اگر آئندہ گورنر راج اور ایمرجنسی ختم ہوتی ہے تو سہیل آفریدی دوبارہ اپنے عہدے پر بحال ہو سکتے ہیں، اس لیے کیس ملتوی کیا جائے۔ اس پر جسٹس باقر نجفی اور چیف جسٹس نے قرار دیا کہ گورنر راج اور ایمرجنسی کا نفاذ الگ معاملات ہیں اور فی الوقت یہ ایک زِندہ ایشو نہیں ہے۔ عدالت نے شیر افضل مروت کو ہدایت کی کہ اگر مستقبل میں سہیل آفریدی بحال ہوتے ہیں تو وہ کیس کی بحالی کے لیے متفرق درخواست دائر کر سکتے ہیں۔

واضح رہے کہ اس درخواست میں علی امین گنڈاپور کے استعفے اور سہیل آفریدی کی وزیراعلیٰ کے طور پر تقرری کو غیر آئینی قرار دیتے ہوئے علی امین گنڈاپور کی بحالی کی استدعا کی گئی تھی۔