پی ٹی آئی دور میں خیبر پی کے دہشتگردی کی لپیٹ میں رہا: غیرملکی صحافی

بین الاقوامی صحافی اور کالم نگار کیٹلن جورڈن باس (Caitlin Jordan Boss) نے پاکستان تحریکِ انصاف (پی ٹی آئی) کے سابقہ دورِ حکومت کے دوران خیبر پختونخوا میں دہشت گردی کے بڑھتے ہوئے واقعات، افغان طالبان اور کالعدم فتنہ الخوارج (ٹی ٹی پی) کے حوالے سے اپنائی گئی پالیسیوں پر شدید تشویش کا اظہار کیا ہے۔

غیر ملکی صحافی کیٹلن جورڈن باس کے مطابق پی ٹی آئی کی صوبائی و مرکزی حکومت کے دوران خیبر پختونخوا میں متعدد دہشت گردانہ حملے ہوئے، لیکن اس وقت کی قیادت کی جانب سے ان کے خلاف موثر کارروائی کے بجائے معاملے کو بظاہر نظر انداز کیا گیا۔ انہوں نے نشاندہی کی کہ فتنہ الخوارج افغانستان کی سرزمین کو استعمال کرتے ہوئے پاکستان بھر میں حملوں میں ملوث رہی ہے، اور ستمبر میں پاکستان نے افغانستان میں سرحد پار کارروائی کر کے ان عناصر کو نشانہ بنایا، جبکہ افغان طالبان حکومت نے تمام تر مطالبات کے باوجود افغان سرزمین استعمال کرنے والے دہشت گردوں کے خلاف عملی اقدامات سے انحراف کیا۔

بین الاقوامی امور کے ماہرین کے مطابق تحریکِ انصاف کا افغان طالبان اور ٹی ٹی پی کے حوالے سے نرم رویہ اور مبہم حکمتِ عملی انسدادِ دہشت گردی کی قومی کوششوں میں بڑی رکاوٹ ثابت ہوئی۔ ماہرین نے خیبر پختونخوا میں امن و امان کی نازک صورتحال کے باوجود ان گروہوں کے خلاف ٹھوس کارروائی نہ کرنے پر عالمی سطح پر سوالات اٹھائے ہیں۔