حزب اللہ کا جنگ میں تباہ گھروں کے مالکان کیلئے 14 ہزار ڈالر امداد کا اعلان

لبنان کی مزاحمتی تنظیم حزب اللہ نے حالیہ جنگ کے دوران تباہ، شدید متاثر یا ناقابلِ رہائش ہونے والے گھروں کے مالکان کی بحالی اور انہیں مالی معاونت فراہم کرنے کے لیے ایک بڑے فنڈز پیکیج کا اعلان کیا ہے۔

حزب اللہ کی ایگزیکٹو کونسل کے سربراہ علی دعموش کے مطابق، دارالحکومت بیروت اور اس کے جنوبی مضافاتی علاقوں (Dahiyeh) میں متاثر ہونے والے خاندانوں کو 14 ہزار امریکی ڈالر فی خاندان تک امداد دی جائے گی، جبکہ لبنان کے دیگر شورش زدہ علاقوں میں اپنے گھر کھونے والے متاثرین کو 12 ہزار ڈالر فی کس فراہم کیے جائیں گے۔ اس مالی امدادی پیکیج میں سے 8 ہزار ڈالر متاثرہ گھرانوں کے فرنیچر اور ضروری گھریلو سامان کی دوبارہ خریداری کے لیے مختص کیے گئے ہیں، جبکہ باقی ماندہ رقم عارضی مکانات کے کرائے کی مد میں دی جائے گی۔

اپنے بیان میں حزب اللہ کے سینئر رہنما علی دعموش نے بے گھر افراد کی بحالی اور جنگ سے متاثرہ شہریوں کی امداد کے معاملے پر لبنانی حکومت کی عدم توجہی اور سست روی کو شدید تنقید کا نشانہ بنایا۔ انہوں نے زور دیا کہ لبنانی حکومت کو محض بیانات تک محدود رہنے کی بجائے جنگ زدہ شہریوں کی بنیادی ضروریات پوری کرنے اور قومی انفراسٹرکچر کی بحالی کے لیے عملی اقدامات کرنے چاہئیں۔