ایران کے کہنے پر سرگرم حوثی تیل کی قیمتیں بڑھانے کی کوشش کر رہے ہیں: ٹرمپ کا دعویٰ

امریکی صدر ڈونلڈ ٹرمپ نے الزام عائد کیا ہے کہ حوثی ملیشیا ایران کی ایما پر دوبارہ متحرک ہوئی ہے اور سعودی عرب پر حملے کر کے عالمی مارکیٹ میں تیل کی قیمتیں مصنوعی طور پر بڑھانے کی کوشش کر رہی ہے۔ ’ٹروتھ سوشل‘ پر اپنے بیان میں ڈونلڈ ٹرمپ نے کہا کہ حوثیوں پر ایک سال قبل شدید بمباری کی گئی تھی، جس کے بعد ان کی درخواست پر حملے روکے گئے اور وہ طویل عرصے خاموش رہے، مگر اب دوبارہ برا رویہ اپنا رہے ہیں۔ صدر ٹرمپ نے ایران کو ایک ناکام ریاست قرار دیتے ہوئے دعویٰ کیا کہ ایران کی معیشت دنیا کی بدترین معیشت بن چکی ہے جہاں مہنگائی کی شرح 301 فیصد تک پہنچ گئی ہے۔ انہوں نے متنبہ کیا کہ امریکی انتخابات کے بعد بھی وہی اقتدار میں رہیں گے اور وہ اِن واقعات کو ہرگز نہیں بھولیں گے۔