پاکستان کی شام میں اسرائیلی جارحیت کی مذمت، مقبوضہ علاقوں سے انخلا کا مطالبہ

پاکستان نے اقوام متحدہ کی سلامتی کونسل (UNSC) میں شام کے تمام مقبوضہ علاقوں سے اسرائیل کے فوری انخلا اور 1974ء کے معاہدے کے مکمل احترام کا مطالبہ کرتے ہوئے اسرائیلی فوجی کارروائیوں کو شام کی خودمختاری اور بین الاقوامی قوانین کی سنگین خلاف ورزی قرار دیا ہے۔ سلامتی کونسل کو بریفنگ دیتے ہوئے پاکستانی مندوب سفیر عثمان جدون نے واضح کیا کہ مقبوضہ گولان کی پہاڑیاں اقوام متحدہ کی قراردادوں 338 اور 497 کے تحت شام کا ناگزیر حصہ ہیں۔ انہوں نے شام کی وحدت، خودمختاری، سیاسی انتقالِ اقتدار اور ایس ڈی ایف (SDF) کے ساتھ مذاکراتی پیش رفت کی حمایت کی، جبکہ عالمی برادری سے شام پر عائد معاشی پابندیاں نرم کرنے کی اپیل بھی کی۔ واضح رہے کہ اقوام متحدہ کے تحقیقاتی کمیشن نے بھی جنوبی و شمال مغربی شام میں حالیہ اسرائیلی فضائی حملوں، قبضے اور شہریوں کی حراست کو جنگی جرائم کے زمرے میں آنے کا اندیشہ ظاہر کرتے ہوئے شدید تشویش کا اظہار کیا ہے۔