پیرا فورس کے اہلکار کیخلاف مقدمے کے اندراج سے متعلق درخواست خارج

لاہور ہائیکورٹ نے شہری پر تشدد، اغوا اور نقدی چھیننے کے الزام میں پیرا فورس کے اہلکار کے خلاف قانون کے مطابق کارروائی جاری رکھنے کا حکم دیتے ہوئے مقدمہ درج کرنے کے احکامات کے خلاف دائر درخواست خارج کر دی ہے۔ جسٹس محمد اجمل زاہد نے اپنے اہم فیصلے میں قرار دیا کہ پیرا فورس کا اہلکار ہونے کی بنیاد پر کسی شخص کو پاکستان پینل کوڈ یا عام فوجداری قانون کے اطلاق سے استثنیٰ حاصل نہیں ہوتا۔ عدالت نے واضح کیا کہ پیرا ایکٹ 2024 کے تحت اختیارات کے غلط استعمال اور عام فوجداری جرم کے درمیان قانونی فرق موجود ہے، اور تشدد جیسے سنگین الزامات کو محض سرکاری عہدے کی آڑ میں نظرانداز نہیں کیا جا سکتا۔ ہائیکورٹ نے پولیس کو دستیاب شواہد اور میڈیکو لیگل سرٹیفکیٹ کی روشنی میں بلا خوف و خطر قانونی کارروائی آگے بڑھانے کی ہدایت کی ہے۔