کوئٹہ کے قریب پاک فوج کا تربیتی طیارہ حادثے کا شکار، دونوں پائلٹ شہید

کوئٹہ کے علاقے نواں کلی کے قریب پاک فوج کا مشاق تربیتی طیارہ تکنیکی خرابی کے باعث حادثے کا شکار ہو کر تباہ ہو گیا، جس کے نتیجے میں طیارے میں موجود دونوں پائلٹس نے جامِ شہادت نوش کیا۔ پاک فوج کے شعبہ تعلقات عامہ (آئی ایس پی آر) کے مطابق شہادت نوش کرنے والوں میں انسٹرکٹر پائلٹ میجر حسنین شہزاد ہمایوں اور سٹوڈنٹ پائلٹ کیپٹن عبدالصمد شامل ہیں۔ اس المناک حادثے پر صدرِ مملکت آصف علی زرداری، وزیراعظم محمد شہباز شریف اور وزیراعلیٰ پنجاب مریم نواز نے گہرے دکھ اور افسوس کا اظہار کرتے ہوئے شہداء کے درجات کی بلندی اور غمزدہ خاندانوں کے لیے صبرِ جمیل کی دعا کی ہے۔ وزیراعظم شہباز شریف نے اپنے تعزیتی پیغام میں کہا کہ ملک کی خاطر جان کا نذرانہ پیش کرنے والے بہادر سپوت قوم کا فخر ہیں اور ان کی قربانیوں کو ہمیشہ قدر کی نگاہ سے دیکھا جائے گا۔