ترقیاتی منصوبوں کی قربانی دے سکتے ہیں، سکیورٹی پر سمجھوتہ نہیں ہوگا: گورنر کے پی

گورنر خیبرپختونخوا فیصل کریم کنڈی نے کہا ہے کہ صوبے میں دہشت گردی کا مکمل خاتمہ اور امن و امان کی بحالی پہلی ترجیح ہے، اور خیبرپختونخوا کو محفوظ و سازگار ماحول فراہم کرنے کے لیے تمام ادارے ایک پیج پر ہیں۔ پشاور میں گورنر کی زیرِ صدارت صوبائی ایپکس کمیٹی کا اہم اجلاس منعقد ہوا جس میں وفاقی وزیر داخلہ محسن نقوی، اعلیٰ عسکری و سول حکام نے شرکت کی اور سیکیورٹی اداروں کی استعداد کار بڑھانے اور ترقیاتی امور پر تفصیلی تبادلہ خیال کیا گیا۔ اجلاس سے خطاب میں گورنر فیصل کریم کنڈی نے واضح کیا کہ پولیس اور سی ٹی ڈی (CTD) کی تمام ڈیمانڈز پوری کر دی گئی ہیں، حکومت سیکیورٹی کے معاملے پر کوئی سمجھوتہ نہیں کرے گی۔ اس موقع پر وفاقی وزیر داخلہ محسن نقوی نے کہا کہ تاریخ میں پہلی بار وفاق اور خیبرپختونخوا انتظامیہ انسدادِ دہشت گردی کے لیے مکمل ہم آہنگ ہیں، اور کے پی پولیس کو جدید ترین اسلحہ و سیکیورٹی آلات کی فراہمی کے لیے وفاق تمام تر ذمہ داری پوری کرے گا۔