مذاکرات کی پیشکش موجود، پی ٹی آئی کو لانگ مارچ ختم کرنا ہو گا: رانا ثناء اللہ

وزیراعظم کے مشیر برائے سیاسی امور سینیٹر رانا ثناء اللہ نے واضح کیا ہے کہ حکومت کی جانب سے پاکستان تحریک انصاف (پی ٹی آئی) کو مذاکرات کی پیشکش اب بھی قائم ہے، تاہم بات چیت کی بحالی کے لیے لانگ مارچ اور دھرنے کی سیاست کا خاتمہ ضروری ہے۔ نجی ٹی وی کے پروگرام ’دنیا مہر بخاری کے ساتھ‘ میں گفتگو کرتے ہوئے رانا ثناء اللہ نے کہا کہ دہشت گردی کے خلاف جنگ میں وفاقی حکومت کے فیصلے کے ساتھ تمام سیاسی جماعتوں، صوبائی حکومتوں اور اداروں کو غیر مشروط طور پر کھڑا ہونا چاہیے، مگر پی ٹی آئی نے انسدادِ دہشت گردی پالیسی سے اتفاق نہ کر کے مذاکراتی عمل میں خود رکاوٹ ڈالی۔

رانا ثناء اللہ نے ان خبروں کی تردید کی کہ حکومت نے عمران خان سے ملاقات پر پابندی لگائی تھی؛ ان کے بقول حکومت نے بانی پی ٹی آئی سے ملاقات، طبی سہولیات اور ان کے ذاتی معالج تک رسائی کی مکمل یقین دہانی کرائی تھی، بشرطیکہ پی ٹی آئی قومی سلامتی کے معاملے پر حکومتی بیانیے کا ساتھ دے۔ انہوں نے دعویٰ کیا کہ تحریک انصاف کا لانگ مارچ اسلام آباد پر اثر انداز ہونے کی پوزیشن میں نہیں اور اگر پی ٹی آئی ایک ماہ بھی سڑکوں پر رہے تو خود تھک جائے گی۔ سینیٹر رانا ثناء اللہ کا مزید کہنا تھا کہ دہشت گردی کے خلاف جنگ میں جمعیت علمائے اسلام (ف) کے سربراہ مولانا فضل الرحمان حکومت اور پاک افواج کے ساتھ مکمل طور پر متحد ہیں۔