انسانی حقوق کمیشن کی رپورٹ: پاکستان کی جیلوں میں گنجائش سے 160 فیصد زائد قیدی، 75 فیصد زیرِ سماعت

انسانی حقوق کمیشن آف پاکستان (HRCP) نے ملک بھر کی جیلوں سے متعلق اپنی سالانہ پریزن ڈیٹا رپورٹ جاری کر دی ہے، جس نے قومی عدالتی و اصلاحاتی نظام کی سنگین صورتحال کو بے نقاب کر دیا ہے۔ رپورٹ کے مطابق پاکستان کی جیلوں میں اس وقت مجموعی طور پر 1 لاکھ 10 ہزار 515 قیدی بند ہیں، جبکہ تمام جیلوں میں صرف 68 ہزار 832 قیدیوں کو رکھنے کی گنجائش موجود ہے۔ اس طرح ملک کی جیلیں اپنی گنجائش سے 160.6 فیصد زیادہ قیدیوں کے ساتھ چل رہی ہیں۔ صوبائی سطح پر سندھ کی جیلیں اپنی گنجائش سے 193 فیصد اور پنجاب کی جیلیں 176.5 فیصد زیادہ بوجھ برداشت کر رہی ہیں، جبکہ 2019ء کے مقابلے میں قیدیوں کی مجموعی تعداد میں 50.1 فیصد کا ڈرامائی اضافہ ہوا ہے۔

رپورٹ میں انکشاف کیا گیا ہے کہ مجموعی قیدیوں میں سے 82 ہزار 988 افراد (75 فیصد سے زائد) ‘زیرِ سماعت’ (Under-trial) ہیں، جن کی تعداد ہی تمام جیلوں کی اصل گنجائش سے 14 ہزار 156 زیادہ ہے۔ ضمانتوں میں تاخیر اور مقدمات کی سست رفتاری کو اس اضافے کی بنیاد قرار دیا گیا ہے۔ اس کے علاوہ انسدادِ منشیات کے سخت قوانین بھی جیلوں پر بوجھ بڑھانے کا اہم سبب بنے ہیں، جہاں انسدادِ منشیات ایکٹ کے تحت 28 ہزار سے زائد افراد قید ہیں اور 2023ء کے بعد ان قیدیوں میں 43.4 فیصد کا اضافہ ہوا ہے۔ کمیشن نے واضح کیا کہ یہ بحران صرف گنجائش کی کمی کا نہیں بلکہ نظامِ انصاف، گرفتاریوں کے طریقہ کار اور عدالتی عمل سے جڑا ہوا ہے