خیبرپختونخوا میں ڈینگی کے وار جاری، مزید 142 کیسز رپورٹ

خیبرپختونخوا میں ڈینگی وائرس کے پے در پے وار جاری ہیں، جہاں گزشتہ 24 گھنٹوں کے دوران مزید 142 افراد میں ڈینگی کی تصدیق ہوئی ہے۔ محکمہ صحت کی تازہ ترین رپورٹ کے مطابق صوبے میں ڈینگی سے متاثرہ مریضوں کی مجموعی تعداد 2 ہزار 912 تک جا پہنچی ہے، جبکہ اس وقت صوبہ بھر میں ایکٹیو کیسز کی تعداد 174 ہے۔ خوش آئند بات یہ ہے کہ اب تک 2 ہزار 738 مریض صحت یاب ہو چکے ہیں اور حالیہ 24 گھنٹوں میں کوئی ہلاکت رپورٹ نہیں ہوئی۔

محکمہ صحت کے اعداد و شمار ظاہر کرتے ہیں کہ ضلع کوہاٹ ڈینگی سے سب سے شدید متاثرہ علاقہ بنا ہوا ہے، جہاں مریضوں کی تعداد 1 ہزار 824 تک پہنچ چکی ہے۔ اس کے علاوہ صوبائی دارالحکومت پشاور میں تصدیق شدہ کیسز کی تعداد 419 ہو گئی ہے۔ دیگر اضلاع میں بنوں سے 122، ضلع خیبر سے 101، ہری پور سے 77 اور چارسدہ سے 54 کیسز کی تصدیق کی گئی ہے۔ طبی ماہرین اور محکمہ صحت نے عوام سے انسدادِ ڈینگی اقدامات پر سختی سے عمل پیرا ہونے کی اپیل کی ہے۔