لانگ مارچ کیلئے سرکاری ہیلی کاپٹر کا استعمال، سہیل آفریدی سے جواب طلب

پشاور ہائیکورٹ نے سیاسی سرگرمیوں اور احتجاجی لانگ مارچ کے لیے سرکاری وسائل کے مبینہ استعمال کے خلاف دائر درخواست پر وزیراعلیٰ خیبرپختونخوا سہیل آفریدی کو نوٹس جاری کرتے ہوئے ان سے تفصیلی جواب طلب کر لیا ہے۔ چیف جسٹس ایس ایم عتیق شاہ کی سربراہی میں دو رکنی بینچ نے مسلم لیگ (ن) کے رکن صوبائی اسمبلی قاری ظاہر کی آئینی درخواست پر سماعت کی۔

درخواست گزار نے عدالت میں موقف اختیار کیا کہ پشاور ہائیکورٹ کے نومبر 2025ء کے واضح فیصلے کے تحت سیاسی سرگرمیوں کے لیے سرکاری وسائل کا استعمال ممنوع ہے، لیکن اس کے باوجود 4 اکتوبر کے احتجاجی لانگ مارچ کے آغاز پر وزیراعلیٰ سہیل آفریدی نے لکی مروت پہنچنے کے لیے مبینہ طور پر سرکاری ہیلی کاپٹر استعمال کیا۔ درخواست میں اکتوبر 2024ء میں سابق وزیراعلیٰ علی امین گنڈاپور کے دور میں اسلام آباد مارچ کے دوران پنجاب پولیس کی جانب سے 10 سے زائد سرکاری گاڑیاں اور 47 اہلکار تحویل میں لیے جانے کا حوالہ بھی دیا گیا اور استدعا کی گئی کہ اس خلاف ورزی کا سخت نوٹس لیا جائے۔ عدالت نے معاملے کی مزید سماعت وزیراعلیٰ کا جواب موصول ہونے تک ملتوی کر دی۔